لما أوروبا جت تعمل نهضتها من العصور الوسطى الظلامية..خدت أحدث ما وصل إليه العلم وقتها وكملت عليه...خدته منين ؟
خدته من العرب والمسلمين...اللى هم كمان كانوا خدوا العلم من آثار الحضارتين الرومانية والإغريقية وكملوا عليه..
وحسب كلام الدكتور أحمد زويل..لولا النقلة اللى عملتها الحضارة الإسلامية دى كان الغرب اتأخر 500 سنة على الأقل..يعنى كان زماننا دلوقتى سنة 2013 بنخترع لسه فى المطبعة...

المهم...انه لما أوروبا خدت عننا العلم...رغم اننا كنا متقدمين عنهم بمراحل، وجت لهم صدمة حضارية لما احتكوا بينا أول مرة أيام الحروب الصليبية...كانوا حريصين جدا انهم يكونوا انتقائيين بشدة فى كل اللى ينقلوه عننا..ياخدوا (علم مجرد)..لا خدوا قيم ولا أسلوب حياة ولا منظومة أخلاقية..
ركبوا العلم المجرد من عندنا على هويتهم هم....
لما حصل العكس..وتقدموا علينا وابتدوا يغزونا..وده ابتدى من معقل الدولة العثمانية نفسها وامتد لباقى البلاد العربية والإسلامية...ماقتصرش اللى خدناه منهم على العلم المجرد...
بالعكس....لحد دلوقتى ماخدناش منهم علم...خدنا منتجات تجارية للتكنولوجيا ومازلنا تلاميذ خايبين لهم فى مضمار العلم..لكن خدنا منهم التقليد الأعمى فى المظهر...نتيجة الشعور بالهزيمة الحضارية...وده بيشبهه أستاذنا الدكتور جلال أمين بأن قبيلة مناخيرهم صغيرة تنهزم قدام قبيلة أخرى مناخيرهم كبيرة..وبسبب ضحالة عقولهم يفتكروا ان المناخير هى سبب الهزيمة..فيركبوا كلهم تانى يوم مناخير كبيرة على وشوشهم..

فئة المتغربين أو العلمانيين فى مجتمعاتنا هى فئة المناخير الكبيرة دى....
اللى هم عايزين ينقلوا من الغرب تقليد أعمى فى كل حاجه..وهم من أسباب أزمتنا تماما مثلهم مثل الذين يرفضون كل ما هو آت من الغرب بدعوى انه استعمارى أو صليبى أو كافر...

ليه بقى الغرب من الأول ماعملش زى جماعة المناخير الكبيرة عندنا لما نقل عننا ؟
لأن النقل خارج نطاق العلم المجرد..نقل القيم والأخلاق وأسلوب الحياة ماينفعش يتجزأ..لو خدوا مننا قيمة واحدة هاتبقى شاذة فى منظومتهم..وغير منطقية...وتلخبط الدنيا...فلازم ياخدوا كل حاجه أو ماياخدوش خالص...

نبص مثلا عندنا لنظام الأسرة فى الإسلام...
المرأة لها ذمة مالية منفصلة عن الراجل ولها اسم عيلتها...
وهى محجبة وغض البصر الجنسين مأمورين بيه...
وبالتالى هى فى الشارع وفى الجامعة وفى السوق وفى العمل كيان إنسانى له عقل ومشاعر..وانت بتتعامل معاها على الأساس ده..مش على أساس انها مصدر للجاذبية البصرية وكأنها فاترينة مثيرة...
والعلاقة بين الرجل والمرأة فى اطار الزواج..تضبطها عواطف وحقوق وواجبات..ولها مهرها والرجل متكفل بكل شىء وفلوسها فى ذمتها المالية لها وحدها..ولا مانع من عمل المرأة لكنها مش ملزمة بالإنفاق فى البيت..ولها دور أساسى فى تربية الأولاد..وللرجل القوامة بقوته وعقلانيته وإنفاقه وله ضعف الميراث مقابل التزاماته المادية..واللى يخرج عن المنظومة دى المجتمع بيعاقبه..وفى نفس الوقت اللى بيفقد أحد عناصر المنظومة دى المجتمع بيرعاه ويحتضنه وياخد بإيده..
والأهل رعاة للمنظومة دى بالدعم وإصلاح ذات البين والكفالة....
ممكن الراجل يتجوز أكتر من واحدة فى اطار الشروط المطلوبة..وكله فى النور وبرضا جميع الأطراف..

الغرب ماخدش عننا المنظومة دى خالص...ماخدش مننا أى حاجه منها..غير ما تعارف عليه الناس منذ القدم على انه الشكل الطبيعى للأسرة...
لما خرج الغرب عن المنظومة دى...عمل لنفسه معايير ومقاييس جديدة...عند الغرب حاليا فى اطار العلمانية..الست والراجل حرين تماما..متساوين تماما..بمبدأ الليبرالية المعروف: انت حر ما لم تضر...حر يمارس الجنس خارج اطار الزواج...حر يمارس الجنس مع راجل تانى...هى حرة تتعرى أو تشتغل عاهرة..حر يبص لها على انها سلعة مادام هى راضية..مافيش التزامات تربوية للأطفال أو مادية على أى طرف..وضاعت الأسرة وبيحاولوا يرجعوها ومش عارفين....بل وفخورين ان بقت فيه اشكال عديدة للأسرة..مثلا ست أم وست تانية أب وبينهم طفل أبوه راجل اتبرع بحيواناته المنوية...أو أم اتبرعت لبنتها برحمها علشان تحط فيه بويضتها ومابقاش معروف الطفل ابن مين فيهم...
الراجل مش من حقه يتجوز واحدة تانية لكن ممكن يعمل علاقات جنسية مع أكتر من واحدة وهى كمان تعمل الأمر نفسه طالما بتراضى الجميع..
تعال لدول بقى قول لهم: الولد المفروض يورث أد البنت مرتين...
الموضوع هايبقى شكله مضحك وعجيب ومتخلف بالنسبة لهم...صح ؟
لأنك بتدخل عنصر واحد على منظومة مش بتاعتها...
ييجوا بقى الجماعة بتوع المناخير الكبيرة اللى عندنا..عايزين يدخلوا عنصر من منظومتهم عندنا...فتلاقى فئات من المجتمع بتتحمس لرأيهم ده وتهلل له...وتسعى لتنفيذه...
ليه ؟
لأنك من الأول سمحت باختراق منظومتك واحدة واحدة..ودخلت بالفعل فيها عناصر مش بتاعتها..اشمعنى دلوقتى معترض ؟؟!!
من هنا تلاقينا ملخبطين...عندنا اباحية زى اللى فى الغرب...عندنا تحرش..عندنا محجبات مش محجبات ولا حاجه..عندنا مجتمع ذكورى الراجل فيه عايز ياخد من المنظومة حقوق من غير ما يأدى واجبات..عندنا أسر مفككة زيها زى اللى فى الغرب..وهكذا...
كل ده يدخل تحت عنوان كبير (تطبيق شريعة)...وعنوان أكبر (هوية)...وبيجاوب على أسئلة كتير الناس مابيعرفوش يجاوبوا عليها من نوعية:
- انتم زعلانين من العلمانية والليبرالية ليه ؟
- هو ايه الفرق بين الإسلاميين وغيرهم ؟
- هو انتم قصدكم ايه بتطبيق الشريعة..الحدود يعنى ؟
- ما كلنا مسلمين بطبعنا..انتم عايزين ايه ؟

والإجابة على ده كله: مش عايزين تبقى مناخيرنا كبيرة...

0 التعليقات:

Post a comment

 
الحصاد © 2013. All Rights Reserved. Powered by Blogger Template Created by Ezzeldin-Ahmed -